Ævintýri
Siglingar út í Grímsey
Best geymda leyndarmálið á Ströndum, nálgaðu lundana í náttúrulegu umhverfi.
Bátsferðirnar út í Grímsey eru aðeins í boði yfir sumartímann (júní–ágúst). Ekki er siglt utan þess tímabils.
Um Grímsey
Sannkölluð náttúruperla
Grímsey í Steingrímsfirði er falleg náttúruperla skammt undan Drangsnesi á Ströndum. Þar mætast fjölbreytt fuglalíf, stórbrotið landslag og fallegt útsýni yfir Steingrímsfjörð og fjöllin í kring.
Grímsey er sérstaklega þekkt fyrir ríkulegt fuglalíf og er vinsæll áfangastaður fuglaáhugafólks. Á sumrin iðar eyjan af lífi þegar fjölmargir sjófuglar verpa þar. Lundinn er einna mest áberandi og þar gefst gott tækifæri til að fylgjast með honum í sínu náttúrulega umhverfi. Auk lundans má sjá fjölmargar aðrar tegundir sjófugla í og við eyjuna.
En Grímsey hefur upp á fleira að bjóða en náttúru og fuglalíf. Þar var áður búið og sjósókn gegndi mikilvægu hlutverki í lífi íbúanna. Enn má finna ummerki um fyrri búsetu sem minna á sögu eyjarinnar. Grímseyjarviti er eitt helsta kennileiti hennar og setur fallegan svip á landslagið.
Siglingin frá Drangsnesi út í Grímsey er stutt og gefur gestum tækifæri til að upplifa Steingrímsfjörð og náttúru Strandanna frá nýju sjónarhorni. Þegar komið er í land er hægt að ganga um eyjuna, fylgjast með fuglalífinu, njóta kyrrðarinnar og virða fyrir sér stórbrotið útsýnið yfir fjörðinn og nærliggjandi fjöll.